Citad veglia
Co vai cun las stizuns en la citad veglia da Cuira?
Tenor in studi da la Scola auta spezialisada dal Grischun FHGR dovri dapli schelta e dapli pussaivladads per seser e flanar en la citad veglia a Cuira. Nus essan spassegiads tras las giassas ed avain dumandà manadras e manaders da locals e cafés tge ch'els dian da quai.
Dieser Artikel wurde zuerst auf rtr.ch veröffentlicht
Sch'ins è amez la citad veglia e va vers il plaz Arcas, van ins sper pliras stizuns, coiffeurs e restaurants ora. Tranter els era ina butia che n'è anc betg uschè ditg en quest lieu – il Membrini. Ina stizun enconuschenta che ha tradiziun en la citad veglia da Cuira. La possessura Marisa Membrini cun ses vestgì elegant e ses chavels nairs di: «Jau pens ch'ins sto far insatge per far la citad veglia pli attractiva.»
"Nus percurschin ch'ins sto dar adina dapli fadia – i na basta betg pli d'avair ina butia cun bella rauba."
Marisa Membrini
Possessura «Membrini»
Cura ch'ins è en la citad veglia, datti numerusas pussaivladads dad ir en differentas giassas che n'èn betg fitg frequentadas. Ed in café dat immediat en egl – Zuzu's Cupcakes. Tut è numnadamain pinc. Las paraids èn pincas, las maisas, las sutgas, ils maletgs vi da las paraids, ils muffins e la vaschella davos la vitrina.
​
La dunna pitschna cun ils chavels blonds prenda in pau pasta, smatga quella en ina furma d'in urs. Ses café saja in success, di ella. Ella haja adina dapli giasts.
.jpeg)
"Jau hai il sentiment ch'i vegnia mintg'onn adina dapli glieud – blers giasts regulars, fidaivels gia dapi 10 onns, quai ma commova fitg."
Zuzana Vinzens
Possessura Zuzu's Cupcakes
Davos il Kornplatz, en in'autra giassa che n'è betg uschè frequentada, datti ina butia che ha da morder fitg. En la vitrina hai vestgadira eleganta e sur porta stat «Ladina Bundi» cun letras alvas. Davostiers sesa ina dunna pli giuvna cun chavels stgirs, ina designra da moda. I tuna auter tar ella. I saja difficil, di Ladina Bundi.
"Igl è grev. Blers van simplamain sperasvi, na gughegian betg dad ir en butia. Quai èn surtut ils indigens e las indigenas."
Ladina Bundi
Designra da moda e possessura «Ladina Bundi»
Ella saja dentant era conscienta, che ses products tutgan en in'autra categoria da prezi. In t-shirt sin ina cumoda custa 350 francs. Il viadi tras la citad veglia da Cuira mussa, che tschertas butias marschan adina meglier, entant ch'i dat era fatschentas che n'èn betg cuntentas cun lur affars.